محترم حضرت حکیم صاحب السلام علیکم! آپ کا عبقری رسالہ عرصہ درا زسے پڑھ رہا ہوں‘ناف ٹھیک کرنے کا ایک ٹوٹکہ ارسال کررہا ہوں‘ جو میرا تجربہ شدہ ہے‘ اس سے ناف سوفیصد ٹھیک ہوجاتی ہے۔ ٹوٹکہ: دونوں ہاتھوں کی شہادت کی انگلیوں اور انگوٹھوں کے درمیان والی جگہ کو مسل کر دیکھیں اگر کوئی گرہ وغیرہ ہے تو ناف پڑی ہوئی ہے‘ درود ابراہیمی تین مرتبہ پڑھ کر کہنی سے لے کر چھوٹی انگلی تک تین پھونکیں ماریں اور پھر اسی جگہ کو مسل کر دیکھیں وہ گرہ ختم ہوجائے گی۔ ناف درست ہوگئی۔ ان شا ء اللہ۔ گرہ کو مسلنے سے ہلکی سے درد ہوگی ‘ پریشانی والی کوئی بات نہیں۔(راؤ محمد صادق‘ ہارون آباد)
قارئین! بعض اوقات لاعلاج بیماریوں میں جہاں بڑی بڑی ادویات اور مہنگے علاج ناکام ہوجاتے ہیں وہاں چھوٹے چھوٹے ٹوٹکے کارگر ثابت ہوتے ہیں جنہیں بظاہر کوئی اہمیت نہیں دی جاتی تو قارئین آپ مستقل بڑے بوڑھوں کے وہ ٹوٹکے سنے یا آزمائے ہوئے ضرور لکھیں‘ عبقری نے ایک ٹوٹکہ سیکشن قائم کیا ہے تاکہ مخلوق کی خدمت ہو اور انسانیت کو نفع پہنچے۔نوٹ: ایسے ٹوٹکے بھیجیں جن میں ادویات کا استعمال نہ ہو اور کہیں ایسا نہ ہو کہ ٹوٹکوں والی کتاب اٹھا کر سارے ٹوٹکے لکھ کر بھیجیں ایسا ہرگز نہ کریں۔ صرف آزمودہ اور سینے کا راز ٹوٹکے ہی بھیجیں۔
